Vetëvendosje lëshon sallën, LDK nuk merr pjesë në votim të pikave të rendit të ditës

Kryetari Ardian Gjini gjatë mbledhjes së mbajtur sot prezantoi disa nga projektet kryesore të vitit 2022. Ai tha se pritet të përfundojë konstrukti i tribunave  të stadiumit të qytetit, rregullimi i  infrastrukturës bazike në Rezinë apo siç njihet Gjakova e re si dhe bashkë me Qeverinë do të diskutohet për hekurudhën që pritet të kalojë nga qyteti.

Për tërë këto pika pati diskutime nga opozita. Çka ngjalli më tepër debat ishte momenti i themelimit të komisionit për dhënien në shfrytëzim të pronës publike, që nga Vetëvendosje u konsiderua që opozitës nuk po i krijohet hapësira e duhur. Poashtu Vetëvendosje vlerësoi se përfaqësuesit e shoqërisë civile nuk janë adekuat për këto komisione, për çka edhe pas replikave lëshuan sallën.

Këshilltarët komunalë të LDK-së sallën nuk e lëshuan por deklaruan se nuk do të votojnë këto komisione.

Kuvendi vazhdoi punën pasi që u konsiderua se ka kuorum të mjaftueshëm.  Në fund u votua edhe për themelimin e disa Komisioneve Komunale të aksionarëve për Ndërmarrjet publike si KRM Çabrati, Stacioni i autobusëve si dhe komisioni komunal për Ndërmarrjen Publike Ngrohtorja e Qytetit.