Presidenti i SHBA-së, Donald Trump, ka thënë se mendon se “është koha që Ukraina të ketë një president të ri”, ndërsa iu përgjigj kritikave të Volodymyr Zelensky-t për marrëveshjen e naftës së SHBA-së me Rusinë, shkruan BBC.
Presidenti ukrainas paralajmëroi se një marrëveshje e re për të liruar miliona ton naftë ruse në SHBA do t’i siguronte Moskës para për të vazhduar luftën e saj kundër kombit të tij, duke e quajtur atë një dhuratë për Presidentin rus Vladimir Putin.
Trump u tha gazetarëve jashtë Shtëpisë së Bardhë të shtunën se Zelensky “dëshiron të krijojë probleme për botën” duke vazhduar të autorizojë sulmet ndaj rafinerive ruse.
Trump tha se homologu i tij ukrainas duhet të “ndalet” përpara se të sugjerojë që Ukraina duhet “të ketë një udhëheqës të ri që mund të bëjë një marrëveshje”.
Që kur Rusia pushtoi Ukrainën në vitin 2022, vendi ka qenë nën gjendje ushtarake, që do të thotë se zgjedhjet janë pezulluar.
Furnizimet globale të karburantit, përfshirë naftën, janë kufizuar rëndë nga lufta kundër Iranit e nisur nga SHBA-të dhe Izraeli, e cila çoi në mbylljen efektive të Ngushticës së Hormuzit, përmes së cilës zakonisht rrjedhin afërsisht një e pesta e produkteve të naftës në botë.
Rusia – një prodhuese e madhe – dhe Ukraina kohët e fundit kanë intensifikuar sulmet e tyre ndaj infrastrukturës energjetike dhe objekteve të transportit të njëra-tjetrës, duke i tensionuar më tej tregjet e energjisë.
“Ne thamë, ‘mund t’i bëni çfarë të doni Rusisë, mos i goditni rafineritë’, sepse ky është një problem botëror që është shkaktuar”, vazhdoi Trump.
“Ai mund të kishte bërë shumë marrëveshje dhe për ndonjë arsye, nuk i bën kurrë.”
I dërguari i Putinit, Kirill Dmitriev, e përshkroi ndërhyrjen e Trump si “ikonike dhe historike”, duke thënë se Ukraina “ka nevojë për lidership të fokusuar në paqe”.
Presidenti amerikan konfirmoi të premten se ishte arritur një marrëveshje me Moskën për të pezulluar sanksionet mbi eksportet ruse të naftës deri më 7 prill.
Zelensky reagoi duke thënë se kjo do t’i lejonte Moskës të mblidhte fonde të reja për të furnizuar pajisje të reja ushtarake për të vazhduar luftën.
Ai gjithashtu akuzoi Moskën se e ka marrë marrëveshjen “si të thotë se ata mund të vazhdojnë të luftojnë, si të thotë se ata vazhdojnë të hedhin bomba mbi qytete” pas sulmeve të reja vdekjeprurëse në Zaporizhzhia.
Presidenti ukrainas foli me disa aleatë të shtunën për të diskutuar zhvillimet e fundit, duke bërë thirrje për “vendime të vërteta për të mbrojtur jetët në Ukrainë” dhe për të mbrojtur sigurinë evropiane.
Një zëdhënës i Downing Street tha se kryeministri i Mbretërisë së Bashkuar Andy Burnham kishte folur me Zelenskyn dhe i kishte ofruar “solidaritetin e tij të plotë”. /KosovaPress/
