Rumania ngriti në ajër dy avionë F-16 pasi zbuloi pesë objektiva ajrore pranë kufirit me Ukrainën

Rumania njoftoi sot se ka ngritur në ajër dy avionë F-16 gjatë natës pasi pesë objektiva ajrore u zbuluan pranë kufirit me Ukrainën, transmeton Anadolu.

“Sistemi i vëzhgimit të radarit të Ministrisë së Mbrojtjes Kombëtare të Rumanisë zbuloi natën e 12 deri më 13 gusht në orën 01:27 një grup prej pesë objektivash ajrore në zonën Izmail, mbi territorin ukrainas, pranë kufirit lumor me Rumaninë”, tha Ministria e Mbrojtjes rumune në një deklaratë.

Ministria vuri në dukje se dy avionë rumunë F-16 u ngritën në ajër për të monitoruar situatën.

“Radarët tokësorë zbuluan një objektiv ajror që depërtonte në hapësirën ajrore kombëtare, afërsisht 2 kilometra në jug të rajonit Pardina. Objektivi qëndroi në hapësirën ajrore kombëtare për rreth 10 minuta, duke lëvizur përgjatë degës Chilia, përpara se të largohej nga territori rumun drejt Ukrainës”, thuhet në deklaratë.

Menjëherë pasi objektivi fluturoi mbi hapësirën ajrore rumune, u raportuan shpërthime mbi territorin ukrainas, tha më tej Ministria rumune e Mbrojtjes. /Anadolu Agency/