Katër persona janë arrestuar në Gjakovë nën dyshimin për përfshirje në veprën penale “Keqpërdorim i pozitës apo autoritetit zyrtar”. Burime të TV Syri bëjnë me dije se të ndaluarit janë:
- Arben Bakalli, Drejtor i Urbanizmit në Komunën e Gjakovës
- Afërdita Lama, ish-Drejtoreshë e Kadastrës, tashmë në pension
- Elida Bejtullahu, urbaniste
- Arianit Kupa, zyrtar komunal
Ndalimi i tyre është bërë me vendim të Prokurorisë Themelore në Gjakovë, ndërsa dyshimet lidhen me procedura të kundërligjshme brenda institucioneve komunale. Arrestimet janë rezultat i një operacioni të zhvilluar nga Njësia për Hetimin e Krimeve Ekonomike dhe Korrupsionit, në bashkëpunim me prokurorin e rastit.
Më poshtë njoftimi i plotë:
Arrestohen katër persona të dyshuar, nën dyshimin për përfshirje në veprën penale ‘keqpërdorimi i pozitës apo autoritetit zyrtar’
Prishtinë, më 23 korrik 2025
Drejtoria për Hetimin e Krimeve Ekonomike dhe Korrupsionit – DHKEK, respektivisht Njësia Rajonale për Hetimin e Krimeve Ekonomike dhe Korrupsionit Prizren, ka ndërmarrë veprime hetimore sipas autorizimit të prokurorit të shtetit, mbi dyshimet se zyrtarë nga Drejtoria e Urbanizmit dhe Drejtoria për Gjeodezi dhe Kadastër në Gjakovë, kanë mundësuar kundërligjshëm bartjen e pronave në pronësi të personave të tretë.
Pas një mori veprimesh hetimore, të kryera në koordinim me prokurorin e shtetit, janë siguruar dëshmi që mbështesin dyshimin e arsyeshëm se katër të dyshuar (dy meshkuj dhe dy femra) nga Drejtoria e Urbanizmit dhe Drejtoria e Kadastrit e Komunës së Gjakovës, dyshohet se me veprimet e tyre në vitet 2018 dhe 2019, kanë lëshuar kundërligjshëm pëlqimet dhe vendimet për parcelizimin dhe bartjen e pronave tek personat e tretë, pa dijeninë dhe autorizimin e pronarëve legjitimë.
Personat e dyshuar janë intervistuar në prezencën e mbrojtësve të tyre, ndaj tyre është iniciuar rasti ‘keqpërdorimi i pozitës apo autoritetit zyrtar’ dhe me aktvendim të prokurorit, të katër të dyshuarit janë ndaluar deri në 48 orë. /tvsyrivision/
Shënim: Personat e përmendur në këtë artikull konsiderohen të pafajshëm, përveç nëse nga gjykata vërtetohet se janë fajtorë me vendim të formës së prerë.
