Rusia ka përjetuar një nga sulmet ajrore më të mëdha me dronë që nga fillimi i luftës në Ukrainë, me mbi 90 dronë që kanë synuar objektiva ushtarakë dhe industrialë në disa rajone të brendshme të vendit gjatë natës dhe mëngjesit të sotëm.
Ministria ruse e Mbrojtjes ka njoftuar se janë rrëzuar gjithsej 94 dronë, por disa prej tyre kanë arritur të godasin objekte të rëndësishme strategjike.
Në Voronezh, forcat ukrainase goditën një depo armësh në aeroportin ushtarak të Borisoglebsk, ku dyshohet se ndodheshin bomba të drejtuara. Autoritetet lokale nuk kanë raportuar për viktima, por zona përreth është shpallur e pasigurt.
Në Çeboksari, dy dronë u përplasën me fabrikën e mbrojtjes “VNIIIR-Progress”, e cila prodhon antena “Kometa”, përdorur për mbrojtjen e dronëve rusë nga sistemet elektronike ukrainase. Dëmet materiale janë të konsiderueshme.
Në rajonin e Leningradit, dy dronë u rrëzuan, duke shkaktuar pasoja të menjëhershme për transportin ajror. Aeroporti ndërkombëtar Pulkovo në Shën Petersburg raportoi mbi 50 vonesa dhe 13 fluturime të anuluara.
Në Saratov dhe Engels, copëzat e një droni të rrëzuar shkaktuan dëme në disa ndërtesa banimi, ndërkohë që shpërthime janë raportuar pranë bazës ajrore Engels, një objekt kyç për aviacionin strategjik të Rusisë.
Në Moskë, kryebashkiaku Sergei Sobyanin deklaroi se dy dronë u neutralizuan ndërsa po afroheshin në zonën periferike të qytetit. Nuk ka raporte për viktima apo dëme materiale.
