Komisioni Evropian zbuloi në parashikimin ekonomik të pranverës se Shqipëria do të ketë rritjen më të lartë të PBB-së për vitin 2025 nga vendet kandidate të Ballkanit Perëndimor për anëtarësim në BE.
Referuar dokumentit institucional, ekonomia e Shqipërisë pritet të rritet me 3.6 për qind në vitin 2025 dhe 3.5 për qind në vitin 2026, nxitur nga kërkesa e brendshme.
Ajo ndiqet nga Serbia me 3.2 për qind, Mali i Zi dhe Maqedonia e Veriut me 3 për qind respektivisht, Bosnjë dhe Hercegovina me 2.0 për qind.
Të mbështetura nga turizmi, eksportet e shërbimeve në Shqipëri pritet të vazhdojnë të zgjerohen, ndërsa eksportet e mallrave pritet të rimëkëmben disi pas dy vitesh tkurrjeje të ndjeshme, shton raporti.
Pas një rënieje të shpejtë në vitin 2024, inflacioni pritet të kthehet gradualisht në objektivin prej 3 për qind vitin e ardhshëm, vëren dokumenti.
Deficiti fiskal pritet të zgjerohet përpara se të bjerë nën 2 për qind të PBB-së në vitin 2026.
Ndërsa raporti i borxhit publik ndaj PBB-së parashikohet të ulet vetëm gradualisht, i nxitur nga rritja nominale e PBB-së.
Situata e BE-së
Komisioni uli ndjeshëm parashikimin e tij të PBB-së ekonomike për BE-në të hënën, pasi paralajmëroi se tensionet e rritura tregtare dhe pasiguria gjeopolitike rrezikojnë të shkaktojnë dëme të mëtejshme në ekonominë tashmë të dobët të bllokut.
Bruksel tani pret që PBB-ja e BE-së të rritet me vetëm 1.1 për qind këtë vit, nga zgjerimi prej 1.5 për qind i parashikuar në nëntor.
Prodhimi i parashikuar i Eurozonës me 20 vende u ul gjithashtu nga 1.3 për qind në 0.9 për qind.
Ulja ishte kryesisht për shkak të një uljeje të ndjeshme të parashikimit të rritjes për Gjermaninë, ekonominë më të madhe të BE-së, industritë e së cilës të varura nga eksporti janë shumë të ekspozuara ndaj tensioneve globale tregtare, të cilat u rritën pas vendosjes së tarifave gjithëpërfshirëse nga presidenti i SHBA-ve Donald Trump muajin e kaluar.
Franca dhe Italia, ekonomitë e dyta dhe të treta më të mëdha të BE-së, gjithashtu patën normat e tyre të parashikuara të rritjes të ulura nga 0.8 për qind në 0.6 për qind dhe 1 për qind në 0.7 për qind përkatësisht.
Ndërkohë, një rritje e konsumit privat dhe “forcimi” i investimeve bëri që Spanja, ekonomia e katërt më e madhe e BE-së, të ketë një rritje të parashikuar të normës së rritjes me 0.3 pikë përqindjeje në 2.6 për qind.
Parashikimi i së hënës vjen pas uljeve të përsëritura të Brukselit të perspektivave të rritjes së Evropës gjatë dy viteve të fundit, pasi kërkesa e dobët, mungesa e investimeve dhe konkurrenca në rritje nga Kina kanë pasur vazhdimisht një ndikim më të madh se sa pritej në ekonominë e bllokut. /Albanianpost.com
