Kryeqytetet evropiane më rezistente ndaj krizës klimatike

Evropa është identifikuar si kontinenti që po ngrohet më shpejt në planet, duke theksuar urgjencën për uljen e emetimeve dhe forcimin e rezistencës ndaj ndryshimeve klimatike.

Kryeqytetet e Evropës Veriore dhe Lindore rezultojnë më rezistente ndaj ekstremeve klimatike krahasuar me pjesën tjetër të kontinentit, sipas një prej databazave më të mëdha mbi përshtatjen klimatike.

Sipas një raporti të Copernicus Climate Change Service (C3S), temperatura mbi mesataren u regjistrua në të paktën 95% të territorit evropian gjatë vitit të kaluar.

Bashkimi Evropian deklaron se raporti “nënvizon urgjencën” që vendet anëtare të reduktojnë emetimet e gazeve serrë drejt nivelit neto-zero dhe të forcojnë mbrojtjen ndaj pasojave klimatike.

Kryeqytetet më rezistente ndaj klimës në Evropë

Një indeks i ri nga iniciativa polake COOLCITY analizoi më shumë se 11 mijë zona urbane evropiane për të vlerësuar se cilat qytete janë fizikisht më të përgatitura për t’u përballur me sfidat klimatike.

Indeksi COOLCITY (CCI), i zhvilluar nga kompania MGGP Aero, kombinon të dhëna satelitore, skanime ajrore me lazer dhe inteligjencë artificiale për të analizuar mjedisin urban.

CCI vlerëson elementët natyrorë dhe infrastrukturorë që ndihmojnë qytetet të mbrohen nga nxehtësia, përmbytjet dhe thatësirat.

Çdo qytet merr një vlerësim nga 0 deri në 10 bazuar në pesë faktorë kryesorë:

-përshkueshmëria e tokës

-gjendja e vegjetacionit

-biodiversiteti

-kushtet ujore

-kushtet termike

Mes kryeqyteteve evropiane, Stokholmi në Suedi kryeson renditjen me një rezultat 6.7, duke kaluar Vilniusin e Lituanisë, i cili mbante vendin e parë vitin e kaluar.

10 kryeqytetet më rezistente ndaj krizës klimatike

Stokholm, Suedi – 6.7
Vilnius, Lituani – 6.4
Riga, Letoni – 6.3
Talin, Estoni – 5.9
Helsinki, Finlandë – 5.8
Zagreb, Kroaci – 5.8
Bratislavë, Sllovaki – 5.7
Varshavë, Poloni – 5.7
Berlin, Gjermani – 5.6
Pragë, Çeki – 5.5

Pse Stokholmi konsiderohet më rezistenti?

Stokholmi mori pikë shumë të larta për përshkueshmërinë e tokës (8.4 nga 10), që do të thotë se reshjet e shiut përthithen më lehtë nga toka dhe nuk shkaktojnë përmbytje.

Gjeografia luan rol të madh, pasi qyteti është i rrethuar nga pyje dhe rezervate natyrore, por autoritetet kanë investuar vazhdimisht për ta ruajtur këtë avantazh.

Që prej emërimit të “zyrtarit të parë të pemëve” në vitin 2001, pemët urbane të Stokholmit janë zhvilluar falë sistemit të njohur si “gropat e pemëve të Stokholmit”, të cilat krijojnë kushte të ngjashme me pyllin nën sipërfaqet urbane, duke ushqyer rrënjët dhe duke thithur ujin e shiut.

Qyteti mori gjithashtu rezultate të mira për gjendjen e vegjetacionit (6.2), që mat shëndetin dhe mbulimin e hapësirave të gjelbra, të cilat ndihmojnë në freskimin e qytetit dhe përthithjen e ujit.

Përbërja unike e qytetit me 14 ishuj, ku liqeni Mälaren derdhet në Detin Baltik, ndikoi pozitivisht edhe në vlerësimin për kushtet termike (6.7), pasi sipërfaqet urbane kanë mekanizma natyrorë ftohës.

Rrjeti i gjerë ujor i qytetit i siguroi gjithashtu Stokholmit një rezultat të lartë për kushtet ujore (6.4), ndërsa për biodiversitetin mori 5.6 pikë. /tvklan.al