Aksidentohet një kamion me një veturë në Gjakovë, lëndohet një person
Kancelari gjerman Olaf Scholz paralajmëroi për pasojat e rënda të fitores së Rusisë në Ukrainë, pak orë para se të nisej për në Washington për t’u takuar me presidentin amerikan Joe Biden.
Në një kolumne në Wall Street Journal, Scholz paralajmëroi aleatët e Ukrainës që të mos shkurtojnë mbështetjen ushtarake për vendin, i cili është duke luftuar me një pushtim rus në shkallë të plotë për gati dy vjet.
“Mesazhi ynë është i qartë: Ne duhet të bëjmë gjithçka që mundemi për të parandaluar fitoren e Rusisë. Nëse nuk e bëjmë, së shpejti mund të zgjohemi në një botë edhe më të paqëndrueshme, kërcënuese dhe të paparashikueshme sesa ishte gjatë Luftës së Ftohtë,” shkroi Scholz.
“Megjithë mbështetjen tonë, Ukraina së shpejti mund të përballet me një mungesë serioze të armëve dhe municioneve”, paralajmëroi kancelari gjerman, duke shtuar se disa detyrime financiare tashmë kanë skaduar dhe disa të tjera duhet të zgjaten.
“Pasojat dhe kostot afatgjata të dështimit për të ndaluar agresionin e presidentit rus Vladimir Putin do të errësonin të gjitha investimet që po bëjmë tani”, theksoi Scholz.
Vizita e Scholz në Washington vjen në një kohë kur përfaqësuesit republikanë amerikanë në Kongres po bllokojnë ndihmën e mëtejshme të SHBA për Ukrainën.
Scholz gjithashtu po përpiqet të bindë disa partnerë evropianë që të rrisin ndihmën e tyre.
“Mos bëni gabim: një fitore ruse në Ukrainë jo vetëm që do të ishte fundi i Ukrainës si një shtet i lirë, demokratik dhe i pavarur, por gjithashtu do të ndryshonte në mënyrë dramatike fytyrën e Evropës”, shkroi Scholz.
“Kjo do t’i jepte një goditje të rëndë rendit botëror liberal. Përpjekja brutale e Rusisë për të kapur territorin me forcë mund të shërbejë si një plan për udhëheqës të tjerë autoritarë në mbarë botën”, paralajmëroi kancelari gjerman.
/Telegrafi/
