Hamza e refuzon ofertën e dytë të Kurtit për presidentin dhe Specialen
Justina Shiroka Pula është zgjedhur Presidente e Republikës së Kosovës me 81 vota të deputetëve, duke siguruar mbështetjen e nevojshme që në rundin e parë të votimit.
Me këtë rezultat, Shiroka Pula është bërë presidentja e Kosovës e zgjedhur me numrin më të madh të votave në Kuvend.
Deri më tani, rekordin e mbanin Fatmir Sejdiu, i cili në vitin 2006 ishte zgjedhur me 80 vota, dhe Atifete Jahjaga, e zgjedhur po me 80 vota në vitin 2011.
Shiroka Pula e ka kaluar këtë shifër me një votë.
Në votimin e mbajtur në Kuvend, Shiroka Pula mori 81 vota, kundërkandidatja Eliza Hoxha mori një votë, ndërsa dy fletëvotime u shpallën të pavlefshme.
Ibrahim Rugova – 2004
Rugova u rizgjodh president në dhjetor të vitit 2004. Pas dështimit për të siguruar shumicën e nevojshme në dy rundet e para, ai u zgjodh në rundin e tretë me 64 vota.
Fatmir Sejdiu – 2006
Pas vdekjes së Ibrahim Rugovës, Kuvendi zgjodhi Fatmir Sejdiun president.
Sejdiu mori 78 vota në rundin e parë dhe 77 në të dytin, ndërsa në rundin e tretë u zgjodh me 80 vota.
Fatmir Sejdiu – 2008
Pas shpalljes së pavarësisë së Kosovës, Sejdiu iu nënshtrua edhe një herë votimit në Kuvend.
Ai mori 62 vota në rundin e parë, 61 në të dytin dhe u zgjodh në rundin e tretë me 68 vota.
Behgjet Pacolli – 2011
Në shkurt të vitit 2011, Behgjet Pacolli u zgjodh president pas tri rundesh votimi.
Pacolli mori 54 vota në rundin e parë, 58 në të dytin dhe 62 vota në rundin e tretë.
Megjithatë, Gjykata Kushtetuese më pas konstatoi se procedura e zgjedhjes së tij kishte qenë në kundërshtim me Kushtetutën.
Atifete Jahjaga – 2011
Pas marrëveshjes politike mes partive kryesore, Atifete Jahjaga u propozua si kandidate konsensuale.
Ajo u zgjodh me 80 vota, duke e siguruar postin që në rundin e parë.
Hashim Thaçi – 2016
Hashim Thaçi u zgjodh president në shkurt të vitit 2016 pas tri rundesh votimi.
Ai mori 50 vota në rundin e parë, 64 në të dytin dhe 71 vota në rundin e tretë, me të cilat u zgjodh president.
Vjosa Osmani – 2021
Edhe Vjosa Osmani u zgjodh pas tri rundesh.
Ajo mori 69 vota në rundin e parë, 67 në të dytin dhe në rundin e tretë u zgjodh Presidente e Kosovës me 71 vota.
Justina Shiroka Pula – 2026
Justina Shiroka Pula u zgjodh presidente më 6 tetor 2026.
Në votimin e fshehtë në Kuvend, ajo mori 81 vota, Eliza Hoxha një votë, ndërsa dy fletëvotime ishin të pavlefshme.
Me 81 vota, Shiroka Pula është presidentja e Kosovës që ka marrë më së shumti vota në Kuvend në votimin në të cilin është zgjedhur presidente.
