Aksidentohet një kamion me një veturë në Gjakovë, lëndohet një person
Njëqind ish-presidentë, kryeministra dhe ministra të jashtëm kanë nxitur Grupin e Shtatë (G7) të vendeve të pasura të paguajnë për vaksinat globale të koronavirusit për të ndihmuar në ndalimin e mutacionit, që e ka kthyer virusin në një kërcënim në të mbarë botën.
Udhëheqësit e bënë thirrjen e tyre përpara një takimi të nivelit të lartë të G7 në Angli, të premten, kur Presidenti i SHBA-së, Joe Biden, do të takohet me udhëheqësit e Britanisë, Francës, Gjermanisë, Italisë, Kanadasë dhe Japonisë.
Kjo është hera e parë që udhëheqësit e G7 takohen që nga fillimi i pandemisë. Samiti 3-ditor do të mbulojë një sërë çështjesh, me një fokus të veçantë në mënyrën se si grupi mund të drejtojë rimëkëmbjen globale nga koronavirusi.
Në letrën e tyre për G7, ish-udhëheqësit botërorë thanë se bashkëpunimi global kishte dështuar në vitin 2020, por që 2021 mund të fillonte një epokë të re.
“Mbështetja nga G7 dhe G20, që i bën vaksinat të arritshme lehtësisht për vendet me të ardhura të ulëta dhe të mesme nuk është një akt bamirësie, por përkundrazi është në interesin strategjik të çdo vendi”, thuhet në letrën e tyre.
Midis nënshkruesve ishin ish-kryeministrat britanikë Gordon Brown dhe Tony Blair, ish-Sekretari i Përgjithshëm i Kombeve të Bashkuara Ban-Ki Moon dhe 15 ish-udhëheqës afrikanë.
Ata thanë se G7 dhe udhëheqësit e tjerë të ftuar në samit duhet të garantojnë të paguajnë atë që do të arrinte në rreth 30 miliardë dollarë në vit për dy vjet, për të luftuar pandeminë në të gjithë botën.
Lutja e ish-udhëheqësve përkoi me një sondazh nga organizata bamirëse “Save the Children” e cila gjeti mbështetje të fortë publike në Shtetet e Bashkuara, Britani, Francë, Gjermani dhe Kanada për G7 duke paguar 66 miliardë dollarë të nevojshëm për vaksinat Covid-19 globalisht.
Në Britani, 79% ishin në favor të një politike të tillë, ndërsa 79% e amerikanëve mbështesnin propozimin, tregoi sondazhi. Mbështetja ishte më e ulët në Francë, ku 63% ishin pro.
Në një deklaratë përpara samitit, kryeministri i Mbretërisë së Bashkuar, Boris Johnson, tha se ai do të nxisë udhëheqësit e tjerë të G7 në samitin për të bërë angazhime konkrete për të vaksinuar botën, si dhe t’i japë mbështetje “Radarit Global Pandemic”, një sistem i ri global i mbikëqyrjes që synon të mbrojë programet e imunizimit.
“Unë u bëj thirrje liderëve të G7 të bashkohen me ne për t’i dhënë fund kësaj pandemie të tmerrshme dhe të premtojnë që nuk do të lejojmë kurrë që shkatërrimi i shkaktuar nga koronavirusi, të ndodhë përsëri”, tha deklarata e Johnson./Ekonomiaonline
