GJERMANI | Gjykata dënon me burg dy persona për bashkëpunim me Iranin dhe planifikim atentatesh
Marrëveshja Trump-Putin për blerjen e naftës ruse (dizel) “është një zgjedhje shumë e rrezikshme” dhe “një legjitimim për Moskën ndërkohë që bombat e saj vazhdojnë të bien mbi qytetet ukrainase”.
Kështu, siç shkruajnë mediat e huaja, përcjell Telegrafi, deklaroi Giorgia Meloni të mërkurën në Romë, duke fituar menjëherë miratimin e Kievit dhe duke provokuar një reagim të ashpër nga Rusia.
Kryeministrja italiane, duke folur në Parlament para se të nisej për në Bruksel për mbledhjen e Këshillit Evropian të së enjtes dhe së premtes, paralajmëroi për një “dobësim të heshtur të mekanizmit të sanksioneve”, gjë që sipas saj bie ndesh me masat e marra deri më tani – përfshirë ato nga Shtetet e Bashkuara – “për ta shtyrë Putinin të ulet në tryezën e negociatave”.
Si reaguan Kievi dhe Moska ndaj deklaratave të Melonit
Lidhur me presidentin rus, liderja italiane shtoi se “ai po provokon Evropën sepse ka nevojë të largojë vëmendjen nga e ecura e konfliktit dhe po kërkon një armik të ri”, ndërsa për sa i përket mbështetjes për Ukrainën, ajo theksoi se “pozicioni i Italisë nuk ndryshon”.
Volodymyr Zelensky, i cili ndodhej për vizitë në Londër të mërkurën, përdori rrjetin social X për të falënderuar Melonin “për të kuptuarit se kush është agresori dhe çfarë do të thotë të ndërtosh një paqe dinjitoze dhe të qëndrueshme”.
Në një intervistë në Mbretërinë e Bashkuar, presidenti ukrainas tha se ishte “e dhimbshme që presidenti Trump zgjedh një anë tjetër”, duke iu referuar në mënyrë të tërthortë mungesës së pretenduar të bashkëpunimit nga rrjeti satelitor amerikan Starlink për ofrimin e të dhënave mbi raketat ruse gjatë valëve të fundit të sulmeve ndaj Ukrainës.
Tonet në Moskë ishin krejtësisht të ndryshme.
Duke komentuar fjalët e Melonit, zëdhënësja e Ministrisë së Jashtme ruse, Maria Zakharova, u tha mediave italiane: “Kjo nuk është çështje që i përket asaj”. /Telegrafi/
