Ukraina përdor për herë të parë në raketën balistike të prodhuar në vend

Ukraina ka përdorur për herë të parë në kushte reale luftimi një raketë balistike të prodhuar në vend, duke shënuar një hap të rëndësishëm në përpjekjet e Kievit për të zhvilluar kapacitete të pavarura raketore.

Presidenti ukrainas, Volodymyr Zelensky, njoftoi përdorimin e parë operacional të raketës FP-7, e njohur në Ukrainë edhe si “Pelikani”, ndërsa publikoi një video nga lëshimi i saj. Ai nuk bëri të ditur objektivin e goditur.

“Balistika taktike ukrainase. FP-7. Përdorimi i parë luftarak”, deklaroi Zelensky.

Sipas të dhënave të publikuara, FP-7 ka një rreze veprimi prej rreth 250 kilometrash dhe mund të mbajë një kokë luftarake prej afërsisht 200 kilogramësh. Për shkak të rrezes së saj, përdorimi i raketës mbetet kryesisht i orientuar drejt objektivave në zonat kufitare të Rusisë.

Zhvillimi i kësaj arme shihet si një hap përtej përdorimit të dronëve me rreze të gjatë veprimi, të cilët Ukraina i ka përdorur gjerësisht për të goditur rafineri, porte, objekte energjetike dhe infrastrukturë tjetër në territorin rus.

Ndryshe nga dronët, raketat balistike lëvizin me shpejtësi shumë më të madhe dhe ndjekin një trajektore që redukton kohën e reagimit për sistemet e mbrojtjes ajrore. Ato mund të mbajnë gjithashtu ngarkesa më të mëdha shpërthyese.

Përdorimi i parë i FP-7 nuk ndryshon menjëherë balancën në front, por tregon përpjekjet e Ukrainës për të ndërtuar një arsenal raketor vendas dhe për të reduktuar varësinë nga armët e furnizuara nga partnerët perëndimorë.

/GazetaSinjali/