Ferit Hoxha: Siguria e Ballkanit Perëndimor dhe siguria e Evropës janë të pandashme
Administrata e presidentit amerikan Donald Trump i ka kërkuar Francës dhe Gjermanisë të nxjerrin në treg një pjesë të rezervave të tyre emergjente të naftës, me synimin për të lehtësuar presionin mbi çmimet globale të karburanteve.
Sipas burimeve të afërta me diskutimet, të cituara nga Reuters, Uashingtoni ka paralajmëruar se nëse vendet evropiane nuk ndërmarrin hapa për të rritur furnizimin, SHBA-ja mund të shqyrtojë ndalimin e eksporteve të naftës diesel.
Kërkesa vjen në një kohë kur çmimet e karburanteve janë rritur ndjeshëm dhe administrata Trump po kërkon mënyra për të shtuar furnizimin në tregun amerikan përpara zgjedhjeve të mesmandatit në nëntor.
Një burim evropian tha se SHBA-ja i ka kërkuar Bashkimit Evropian të nxjerrë nga rezervat rreth 120 milionë fuçi diesel gjatë gjashtë muajve të ardhshëm, transmeton Telegrafi.
Një sasi e tillë do të përfaqësonte më shumë se 40% të rezervave emergjente të dieselit dhe gasoil-it të BE-së, sipas të dhënave të fundit të disponueshme. Franca dhe Gjermania së bashku mbajnë rreth 35% të rezervave strategjike të BE-së, duke i bërë ato veçanërisht të rëndësishme në këtë përpjekje.
Komisioni Evropian, Gjermania, Franca, Italia, Irlanda dhe Britania e Madhe kanë zhvilluar diskutime mbi nevojën për të nxjerrë më shumë diesel nga rezervat emergjente.
Sekretari amerikan i Energjisë, Chris Wright, tha se Uashingtoni pret njoftime nga vendet evropiane për furnizime të reja me diesel.
Sipas tij, tregu ndërkombëtar është goditur nga humbja e disa eksporteve nga Lindja e Mesme dhe Kina, duke krijuar ndërprerje të rëndësishme në furnizim.
Presioni ndaj Francës dhe Gjermanisë lidhet edhe me faktin se zyrtarët amerikanë besojnë se të dyja vendet nuk kanë zbatuar plotësisht angazhimet e mëparshme për lirimin e rezervave të naftës dhe produkteve të saj.
Një zyrtar amerikan tha se është në interesin e Evropës të bashkëpunojë me SHBA-në për të rritur furnizimin me produkte të rafinuara dhe për të ulur kostot për konsumatorët.
Franca dhe Gjermania nuk kanë komentuar menjëherë kërkesën amerikane. Ndërkohë, Pallati Élysée tha se Emmanuel Macron dhe Donald Trump nuk e diskutuan këtë çështje gjatë takimit të tyre në Nju Jork javën e kaluar.
Megjithatë, Macron pritet të thërrasë një videokonferencë me liderët e vendeve të G7, për të diskutuar rritjen e çmimeve të karburanteve dhe furnizimin global me produkte të rafinuara.
Në fokus do të jetë edhe koordinimi i lirimit të rezervave strategjike në bashkëpunim me Agjencinë Ndërkombëtare të Energjisë (IEA).
Evropa është bërë gjithnjë e më e varur nga importet e dieselit amerikan pasi ndaloi importet ruse pas pushtimit të Ukrainës, ndërsa lufta SHBA-Izrael kundër Iranit ka dëmtuar më tej furnizimet nga Lindja e Mesme.
Në këtë situatë, një ndalim i mundshëm i eksporteve amerikane do të kishte ndikim jo vetëm në Evropë, por edhe në tregun global të karburanteve. SHBA-ja është bërë një furnizues i rëndësishëm i dieselit për tregjet evropiane pikërisht në një periudhë kur burimet alternative të furnizimit janë kufizuar.
Për momentin, nuk ka një ndalim të vendosur të eksporteve amerikane. Bëhet fjalë për një masë që administrata Trump po e shqyrton si pjesë të përpjekjeve për të rritur furnizimin dhe për të ulur çmimet në tregun amerikan. /Telegrafi/
