CNN: AfD e Gjermanisë është aq ekstremiste sa po i largon edhe partitë e tjera të së djathtës ekstreme

Rritja e Alternativës për Gjermaninë (AfD) në Gjermani po shkakton shqetësim të gjerë, përfshirë edhe në qarqe të papritura – te partitë e tjera të së djathtës ekstreme europiane.

Ndërsa partia gjermane po arrin nivele rekord të mbështetjes në vend, disa nga aleatët e saj më të afërt ideologjikë gjetkë në Europë po mbajnë distancë prej saj, shkruan CNN.

Ky tension u shfaq sërish pas zgjedhjeve të fundit rajonale në Gjermani. Në landin e Saksonisë-Anhaltit, në fillim të këtij muaji, AfD-ja shënoi përparime historike kur fitoi 43.8% të votave, duke mbetur vetëm tre vende larg një shumice absolute. Zgjedhjet në Meklenburg-Pomeraninë dhe në Berlin fundjavën e kaluar treguan gjithashtu një largim nga partitë kryesore drejt skajeve, veçanërisht drejt AfD-së.

Disa nga liderët e partive të bllokut të së djathtës ekstreme i kanë ofruar urimet e tyre, përfshirë Geert Wilder të Partisë për Lirinë të Holandës, Viktor Orban të Fidesz-it të Hungarisë dhe Santiago Abascal të Vox-it të Spanjës, i cili e përshëndeti përparimin e AfD-së si “një ‘shpresë të madhe për Gjermaninë dhe Europën’”.

Por disa nga partitë më të mëdha të së djathtës ekstreme në Europë – përfshirë ato në Francë, Itali dhe Britani – kanë heshtur.

Tubimi Kombëtar i Francës (RN), dikur një nga partnerët më të afërt të AfD-së, tha edhe para votimit në Saksoni-Anhalt se një bashkëpunim i ripërtërirë me AfD-në “nuk është planifikuar”.

Për lideren e partisë, Marine Le Pen, këtu luan rol si një llogari e brendshme politike, ashtu edhe një llogari ideologjike.

Nën udhëheqjen e saj, Tubimi Kombëtar ka përqafuar atë që e quan “detoksifikim”, duke e larguar partinë nga ksenofobia e hapur e rrënjëve të saj nën babanë e saj, Jean-Marie Le Pen, drejt rrjedhës kryesore politike. /CNN/