GTA 6 pritet të sjellë fitime rekord, parashikohen miliona porosi paraprake
Dy kongresistët amerikanë, republikani Keith Self dhe demokrati Suhas Subramanyam, pritet që të martën të qëndrojnë për një vizitë zyrtare në Kosovë, gjatë së cilës do të takohen me krerët e shtetit.
Vizita e tyre do të vijë pas asaj në Serbi, ku ata do të vizitojnë edhe Luginën e Preshevës. Ndërsa të dielën, Self dhe Subramanyam qëndruan në Sarajevë, ku u takuan me përfaqësuesit e presidencës së Bosnjes dhe Hercegovinës.
Në janar të këtij viti, anëtarët e Komitetit për Politikë të Jashtme të Dhomës së Përfaqësuesve të Kongresit amerikan miratuan një projektligj që i kërkonte Sekretarit amerikan të Shtetit të përgatiste një raport gjithëpërfshirës për pozitën e pakicave në Serbi, me fokus të veçantë te shqiptarët në Luginën e Preshevës.
Gjatë javës së kaluar, kryeministri në detyrë Albin Kurti ka zhvilluar një takim virtual me një grup kongresistësh, në mesin e të cilëve ishte edhe Self.
Ndërsa në fund të muajit prill, disa kongresistë amerikanë propozuan një rezolutë që synon të shtyjë përpara rrugën e Kosovës drejt NATO-s.
Përveç kësaj, është prezantuar edhe një rezolutë tjetër nga të njëjtit kongresistë, në të cilën kërkohet mbështetja për praninë e trupave amerikane në kuadër të KFOR-it në Kosovë.
Në dokumentin e dorëzuar theksohet rëndësia e vazhdueshme e pranisë së KFOR-it në Kosovë për ruajtjen e paqes dhe stabilitetit në rajon, duke argumentuar se tensionet ndërmjet Kosovës dhe Serbisë mbeten ende të pazgjidhura dhe se situata e sigurisë kërkon angazhim të vazhdueshëm ndërkombëtar. /Albanianpost.com
