Shefja e Komitetit për Punë të Jashtme në Parlamentin e Britanisë së Madhe, Alicia Kearns, ka kërkuar që kryekrimineli Milan Radojiçiç, dhe terroristët e tjerë që sulmuan Policinë e Kosovës në Banjskë të Zveçanit më 24 shtator të vitit të kaluar, të përballen me drejtësinë.
Këto komente, Kearns i ka bërë përmes një postimi në platformën X, në njëvjetorin e sulmit terrorist ku mbeti i vrarë rreshteri Afrim Bunjaku.
“Një vit nga sulmi i Banjskës. Një vit nga vrasja e Afrim Bunjakut. Milan Radojiçiç dhe përgjegjësit duhet të përballen me drejtësinë”, shkroi Kearns.
Deputetja britanike potencoi se drejtësia është e nevojshme për pajtimin dhe paqen në Ballkan.
Çka ndodhi në Banjskë?
Një grup i armatosur më 24 shtator të 2023-së, kishte sulmuar Policinë e Kosovës në Banjë të Zveçanit, duke lënë të vrarë rreshterin, tanimë heroin Afrim Bunjaku.
Nga shkëmbimet me armë zjarri, Policia e Kosovës fillimisht kishte asgjësuar katër terroristë, teksa gjashtë të tjerë i arrestoi. Në lidhje me këtë rast, Prokuroria ka ngritur aktakuzë ndaj 45 personave, përfshirë Radojiçiç-in.
Autoritetet e Kosovës kishin akuzuar drejtpërdrejtë Serbinë se qëndron prapa këtij sulmi terrorist, teksa kryekrimineli Radojiçiç – njeri i besuar i presidentit serb Aleksandër Vuçiç – kishte marrë përgjegjësinë për këtë sulm.
Radojiçiç e pranoi organizimin dhe përfshirjen në këtë sulm terrorist.
Ai ishte arrestuar nga autoritetet serbe, mirëpo i njëjti një ditë më pas ishte liruar nga paraburgimi.
Vendet perëndimore, përfshirë Shtetet e Bashkuara të Amerikës dhe Bashkimi Evropian e kanë dënuar këtë sulm, derisa kanë kërkuar që përgjegjësit të sillen para drejtësisë. /Albanianpost.com
