Përpara se të fillojë detyrën e tij të re si shef i NATO-s, Mark Rutte, tashmë po shqyrton disa CV nga ata që kërkojnë të jenë krahu i tij i djathtë.
Deputeti aktual, Mircea Geoană, i cili ka mbajtur këtë post që nga viti 2019, pritet të japë dorëheqjen për të kandiduar në zgjedhjet presidenciale rumune në nëntor.
Të paktën kështu shkruan “Politico”, e cila ka biseduar me zyrtarë e diplomatë të NATO-s.
Një diplomat i lartë i NATO-s nga Evropa Perëndimore tha se, ekziston një konsensus i përgjithshëm midis aleatëve që një evropianolindor duhet të emërohet si zëvendës i Rutte.
Biseda në selinë e NATO-s përqendrohet rreth dy ish-zyrtareve nga Maqedonia e Veriut dhe Bullgaria, dy vende ballkanike që dikur ishin nën kontrollin sovjetik deri në fund të Luftës së Ftohtë.
“Posti mund t’i shkojë një gruaje të Evropës Lindore”, tha ish-zëdhënësja e NATO-s, Oana Lungescu.
Rutte do të marrë drejtimin e NATO-s më 2 tetor, në një kohë kur aleanca ushtarake vendoset në një mision urgjent për të mbështetur krahun lindor me qëllim që të parandalojë çdo agresion të mundshëm rus.
Gjermania, për shembull, vlerëson se Rusia mund të jetë e gatshme ushtarakisht të sulmojë vendet e NATO-s në pesë deri në tetë vjet, nëse vendos ta bëjë këtë.
Kjo e bën të rëndësishme një njohuri të thellë në “Kremlinologji” kur bëhet fjalë për zgjedhjen e Rutte për zëvendësin e tij.
Emri i ish-ministres së mbrojtjes të Maqedonisë së Veriut, Radmila Shekerinska, është shpërndarë gjerësisht, sipas një diplomati të NATO-s dhe zyrtarit të lartë të NATO-s.
Nëse zgjidhej, ajo do të ishte zyrtarja më e lartë e NATO-s ndonjëherë nga rajoni i Ballkanit Perëndimor jashtë Bashkimit Evropian.
Vendi u bashkua me NATO-n katër vjet më parë, me Shekerinska që luan një rol kyç në anëtarësimin e saj.
Shekerinska pro-perëndimore është aktualisht nënkryetare e Partisë së Socialistëve Evropianë në mbarë Evropën.
Në një intervistë pas pushtimit në shkallë të plotë të Ukrainës nga Rusia, ajo hodhi poshtë pretendimin e Rusisë se zgjerimi i NATO-s drejt lindjes ishte një “plan i keq perëndimor”.
Majda Ruge, bashkëpunëtore e lartë e politikës në institutin e mendimit të Këshillit Evropian për Marrëdhëniet me Jashtë, e vlerësoi atë si një kandidate ideale.
“Për zëvendëssekretarin e përgjithshëm të ardhshëm, NATO-s do t’i duhet një figurë e lartë që është shumë kompetente, është e zgjuar dhe gjithashtu i kupton sfidat në Ballkanin Perëndimor, Radmila Shekerinska i përshtatet atij profili”, tha Ruge, e cila është një eksperte në rajonin e Ballkanit.
Një tjetër pretendente është ish-zëvendëskryeministrja e Bullgarisë dhe ish-komisionerja evropiane Mariya Gabriel, sipas dy zyrtarëve me njohuri të drejtpërdrejta për planet e saj.
“Ka thashetheme rreth ish-komisioneres evropiane dhe zëvendëskryeministres bullgare Mariya Gabriel”, tha Lungesku. /Albanianpost.com
