Presidenti amerikan, Joe Biden, dhe presidenti ukrainas, Volodymyr Zelensky, nëpërmjet një telefonate kanë diskutuar pushtimin e Rusisë dhe përpjekjet e fundit të SHBA-ve për të forcuar mbrojtjen ajrore të Ukrainës.
Sipas një deklarate të publikuar në faqen e internetit të Ukrainës, Zelensky falënderoi Biden për një ndihmë shtesë prej 275 milionë dollarësh për sigurinë.
Paketa e shpallur javën e kaluar përfshin armë dhe raunde artilerie, si dhe pajisje për të ndihmuar Ukrainën të forcojë mbrojtjen e saj ajrore.
“Biden ripohoi përkushtimin e SHBA-ve për të vazhduar ofrimin e ndihmës së sigurisë, ekonomike dhe humanitare për Ukrainën, duke e mbajtur Rusinë përgjegjëse për krimet e saj të luftës dhe mizoritë e saj”, tha Shtëpia e Bardhë në një deklaratë.
Zelensky theksoi se “ndihma e paprecedentë e mbrojtjes dhe financiare” nga SHBA-të ndihmoi “jo vetëm për të pasur sukses në fushën e betejës”, por gjithashtu “për të ruajtur stabilitetin e ekonomisë së kombit tonë”, sipas deklaratës ukrainase.
Ai i tha presidentit amerikan se “terrori raketor rus” ka çuar në shkatërrimin e rreth 50% të infrastrukturës energjetike të Ukrainës, ndërsa falënderoi SHBA-të për ndarjen e ndihmës posaçërisht për rindërtimin e sistemeve energjetike të Ukrainës.
Sipas deklaratës së Shtëpisë së Bardhë, Biden theksoi gjithashtu paketën prej 53 milionë dollarësh të shpallur në fund të muajit të kaluar për të mbështetur sistemin elektrik të Ukrainës pasi ajo përballet me një breshëri sulmesh nga Rusia. /Albanianpost.com
