Rusia mund të jetë gati të provokojë një shpërthim të lokalizuar në centralin bërthamor të Zaporizhzhia, ka thënë presidenti i Ukrainës Zelensky.
Ky i fundit përmendi inteligjencën ukrainase si burimin e informacionit të tij dhe bëri thirrje për vëmendje më të madhe ndërkombëtare ndaj situatës në objektin, centralin më të madh bërthamor në Evropë.
Që nga kapja e tij vitin e kaluar, Moska e ka kthyer atë në një bazë ushtarake nga e cila ka bombarduar qytetet ukrainase përgjatë rezervuarit të Dnipros.
“Ekziston një kërcënim serioz sepse Rusia është teknikisht e gatshme të provokojë një shpërthim lokal në stacion, i cili mund të çojë në një lëshim rrezatimi”, tha Zelenskyy në një konferencë të përbashkët shtypi në Kiev me kryeministrin spanjoll, Pedro Sánchez.
Më herët të premten, drejtoria e inteligjencës ushtarake të Ukrainës (GUR) pretendoi se trupat ruse po reduktonin praninë e tyre në termocentralin bërthamor të Zaporizhzhia, me personelin që iu tha të zhvendosej në Krime dhe patrullat ushtarake u zvogëluan.
Shefi i agjencisë, Kyrylo Budanov, ka pretenduar se Moska ka miratuar një plan për të hedhur në erë stacionin dhe ka minuar katër nga gjashtë njësitë e energjisë, si dhe një pellg ftohës.
Sipas GUR, disa përfaqësues të agjencisë shtetërore të energjisë bërthamore të Rusisë, Rosatom, janë larguar tashmë. Punonjësve ukrainas që qëndruan në uzinë dhe nënshkruan kontrata me Rosatom u ishte thënë të evakuoheshin deri të hënën, mundësisht në Krime, tha ai.
Të enjten Ukraina kreu stërvitje të reagimit ndaj katastrofave bërthamore në afërsi të termocentralit, thanë zyrtarët rajonalë.
Ambasadori i Rusisë në OKB, Vassily Nebenzia, u përgjigj duke thënë se i kishte shkruar Këshillit të Sigurimit të OKB-së dhe sekretarit të përgjithshëm, António Guterres, për të deklaruar se, “ne nuk kemi ndërmend të hedhim në erë këtë NPP [central bërthamor]”.
Në një zhvillim të veçantë, gjenerali i ushtrisë amerikane, Mark Milley, i tha Klubit Kombëtar të Shtypit në Uashington se kundërofensiva e Ukrainës mund të zgjasë deri në “10 javë” dhe të jetë “shumë, shumë e përgjakshme”.
“Lufta në letër dhe lufta e vërtetë janë të ndryshme”, tha Milley.
SHBA po shqyrton gjithashtu miratimin e transferimit të kokave të diskutueshme të municioneve thërrmuese në Ukrainë për të nxitur kundërsulmin e Kievit, raportoi CNN. /Albanianpost.com
