Ministrja e Punëve të Jashtme, Donika Gërvalla, i është kundërpërgjigjur Shefit të Diplomacisë së BE’së, Josep Borrell, i cili reagoi për arrestimet në veri, të cilat i cilësoi si “jashtëgjyqësore”.
Kryediplomatja e ka shpërndarë postimin e Borrell dhe ka pyetur nëse Bashkimi Evropian po bën thirrje që të mos ndëshkohen ata që sulmuan pjesëtarët e NATO’s, shkruan Gazeta Online Reporteri.net.
“A po bën thirrje BE-ja për mosndëshkim për ata që sulmuan NATO-n?”, ka pyetur Gërvalla.
Ajo ka thënë se Policia ka prova të qarta se personi i arrestuar sot ka marrë pjesë në sulmin ndaj ushtarëve të NATO’s më 29 maj në Zveçan dhe se arrestimi i tij është bërë në bazë të Kodit të Prcoedurës Penale të Kosovës dhe se s’ka asgjë “jashtëgjyqësore”.
“Policia ka prova të qarta se personi i arrestuar sot ka marrë pjesë në sulmin kundër NATO-s më 29 maj. Arrestimi u bë në bazë të nenit 71 të Kodit të Procedurës Penale të Kosovës, kështu që nuk ka asgjë jashtëgjyqësore”, ka shkruar Gërvalla në Twitter.
Is the EU calling for impunity for those who attacked NATO?
The police has clear evidence that the person arrested today participated in attack against NATO on 29 May.
The arrest took place based on Art.71 of Kosovo’s Criminal Procedure Code so there’s nothing extra-judicial. https://t.co/LSqvIHrvf0— Donika Gërvalla-Schwarz (@gervallaschwarz) June 23, 2023
Edhe Kryeministri Albin Kurti është treguar i ashpër me Shefin e Diplomacisë së Bashkimit Evropian, Josep Borrell.
Kurti ka thënë se “përhapja e panikut dhe pretendimeve të rreme” vetëm ndez tensionet dhe ndihmon ata që kërkojnë t’i përshkallëzojnë ato.
Ai i ka bërë thirrje Kryediplomatit të BE’së që të konfirmojë burimet e tij dhe të pres informacione zyrtare nga institucionet e Kosovës, para se të deklarohet, shkruan Gazeta Online Reporteri.net.
“Përhapja e panikut dhe pretendimeve të rreme vetëm ndez tensionet dhe ndihmon ata që kërkojnë t’i përshkallëzojnë ato. Një thirrje për të gjithë: ju lutemi konfirmoni burimet tuaja dhe prisni informacione zyrtare nga institucionet e Kosovës përpara se të vendosni të angazhoheni publikisht në transmetimin e lajmeve ose parashikimin e ngjarjeve”, ka shkruar Kurti në Twitter.
Për stërvitjen e FSK’së, Kurti ka thënë se ky është aktivitet i përvitshëm dhe se KFOR’i ka qenë “plotësisht i informuar”.
Sa i përket arrestimit të sotëm në veri, Kurti ka thënë se “si kryeministër i një shteti demokratik kam zero përfshirje në hetimet e krimeve dhe arrestimeve”.
Ndryshe, Borrell ka thënë se është tejet i shqetësuar me arrestimet e serbëve në veri si dhe me marshimin e FSK-së. Madje, këto arrestime, Shefi për Diplomaci i Bashkimit Evropian i ka cilësuar si “jashtëgjyqësore”.
“Shumë i alarmuar nga situata në veri të Kosovës: arrestime jashtëgjyqësore të serbëve të Kosovës dhe Forcave të Sigurisë së Kosovës që marshojnë në Mitrovicën e Jugut; e ndjekur nga retorika e rëndë nga Serbia.”, ka shkruar Borrell në Twitter.
Borrell ka thënë se përshkallëzimi po bëhet i rrezikshëm, derisa ka shtuar se nuk do ta tolerojnë këtë.
”Pavarësisht takimit të djeshëm të krizës, përshkallëzimi vazhdon dhe po bëhet i rrezikshëm. Nuk do ta tolerojmë.”, shktoi ai.
